بيعيش (بيشوب) في اليخت بتاعه في منطقه سياحيه عالبحر, وبيصحى الصبح يشرب قهوته ويشغل الاسطوانة اللي بيحبها ,وبيقعد يسمع المزيكا شويه وبعدين بيخرج من اليخت وبيفعل قنبله جواه في حالة ان حد فكر يسرقه ولا حاجه ,وبيركب الموتوسيكل وبيروح على مطعم كل اللي بيشتغلو هناك عارفينه, فبيشاورله الويتر على الترابيزه اللي بيقعد عليها منه للبحر على طول, و شويه كدا وبتجيله واحده بملامح اسيويه, وبتقله بقالى كتير اوي بدور عليك ,بص من الاخر كدا الريس بتاعي عوزك تقتله تلاته, وقتلهم يبان للناس انه حادثه قضاء وقدر يعنى,واظن ان دا مش صعب عليك, بما انك الكبير فمجالك ,وبتهدده لو ماوفقش انها تبلغ جهات كتير هو مطلوب عندها انه لسه عايش ,لانه كان زيف موضوع موته وبعد عن كل حاجه,ولما بيبص حواليه يمين وشمال بيلاقى معاها رجاله شكلهم مش ولابد ,وبيبوصوله بتهديد ,فبيطلب منها انه يعمل مكالمة تليفون ,وبيطلع تليفونه يصورها ,ولما بتحاول تطلع مسدسها بيمنعها وبيضربها ,وبعدها بيتهجم عليه الرجاله اللي معاها ,لكن هو بيديهم العلقه التمام ..